1Sa 21 | NdeIBE | STEP | UDavida waya eNobi ku-Ahimeleki umphristi. U-Ahimeleki wathuthumela ekuhlanganeni kwakhe laye, wasebuza esithi, “Kungani uwedwa na? Kungani kungekho olawe na?”

1 Samuel 21

UDavida eNobi

1 UDavida waya eNobi ku-Ahimeleki umphristi. U-Ahimeleki wathuthumela ekuhlanganeni kwakhe laye, wasebuza esithi, “Kungani uwedwa na? Kungani kungekho olawe na?”

2 UDavida waphendula u-Ahimeleki umphristi wathi, “UJehova ungiphathise udaba oluthize, wathi kimi, ‘Akungabi khona ozakwazi ngenjongo yakho langalokho okuthunyiweyo.’ Abantu bami ngibatshele ukuba bahlangane lami endaweni ethize. 3 Manje-ke, kuyini olakho? Ngipha izinkwa ezinhlanu, loba kuyini ongakuthola.”

4 Kodwa umphristi waphendula uDavida wathi, “Kangilasinkwa esejwayelekileyo; kodwake kulesinkwa esingcwelisiweyo lapha – uma abantu bezigcinile esifazaneni.”

5 UDavida waphendula wathi, “Impela abesifazana babevinjelwe kithi, njengenjwayelo lapho ngiphuma. Imizimba yamadoda ingcwele lasemikhankasweni engengcwele. Pho ingaba njalo okungakanani lamhla!” 6 Ngakho umphristi wamnika isinkwa esingcwelisiweyo ngoba kwakungelasinkwa lapho ngaphandle kwesinkwa sobukhona bukaJehova esasisuswe phambi kukaJehova kwasekubekwa esitshisayo endaweni yaso ngosuku esasuswa ngalo.

7 Ngalolosuku omunye wezinceku zikaSawuli wayekhonapho, ekhonza phambi kukaJehova; wayenguDoyegi um-Edomi, induna yabelusi bakaSawuli.

8 UDavida wabuza u-Ahimeleki wathi, “Kawulamkhonto kumbe inkemba lapha na? Kangizanga lenkemba yami loba nje esinye isikhali, ngoba umsebenzi kaJehova ubungophuthumayo.”

9 Umphristi waphendula wathi, “Inkemba kaGoliyathi umFilisti owambulalayo eSigodini sase-Ela, ilapha; igoqelwe ngelembu ngemuva kwesambatho semahlombe. Uma uyifuna, ithathe; kakukho enye inkemba lapha ngaphandle kwaleyo.” UDavida wasesithi, “Kayikho enjengayo; ngipha yona.”

UDavida eGathi

10 Ngalolosuku uDavida wabalekela uSawuli waya ku-Akhishi inkosi yaseGathi. 11 Kodwa izinceku zika-Akhishi zathi kuye, “Lo kasuDavida inkosi yelizwe na? Kasuye yini abahlabela ngaye emigidweni yabo besithi: “ ‘USawuli ubulele izinkulungwane zakhe, kodwa uDavida ubulele amatshumi ezinkulungwane zakhe’?”

12 UDavida wawagcina amazwi la enhliziyweni yakhe wamesaba kakhulu u-Akhishi inkosi yaseGathi. 13 Ngakho wazenza ophambeneyo kubo; njalo kwathi lapho ekubo wenza njengomuntu ohlanyayo, edwebadweba ezivalweni zesango njalo egxoza lendenda zehlele ezindevini zakhe.

14 U-Akhishi wasesithi ezincekwini zakhe, “Khangelani umuntu lo! Uphambene! Kungani limletha kimi na? 15 Lithi ngiziswele yini izinhlanya lize lilethe umuntu lo lapha ukuba aqhubeke kanje phambi kwami na? Umuntu lo kumele angene endlini yami na?”